**********************************
يا شعب سوريا الابي
اعذرني كنت غبي
لما استنيت شمسى
تشرق من مغربي
اعذرني يا نازح متهجر
تايه عن وطنك شريد
اعذرني يا حي يا متفجر
اعذريني يا ام الشهيد
اعذرني يا غرقان ع شط
اللاذقية متحاصر وحيد
اعذرني يادي الصبي
اعذرنى يا حمصى يا دمشقى
يا ريفى يا عشقى
اعذرنى يا طرطوس
يا درعا يا رقة
حبى ده مش شفقة
ده انت لايمانى الزاد
ولقلبى الدقة
اعذرنى يا حلبى
معاك نسيت قلبى
لو كنا يوم تهنا
نورك ينور دربى
ثورتك تلهب حبى
شعبك ده هو شعبى
نجاته فى مركبى
يا شعب سوريا الابى
اعذرنى لو سبتك فى يوم محروم
اعذرنى لو ما قدرت امسح دمعة المظلوم
ربيعنا ده مش خريف ولا عمره كان مشؤوم
اعدائنا شوية خونة ع صهاينة و فرس و روم
معاهم راجل منافق سموه بالغلط عربى
يا شعب سوريا الابى
اعذرنى لو سبتك وتهت فى ثورتى
لما نسيت ضحكتك نسيتنى ضحكتى
انا كنت سيفك وانت كنت عزتى
اتفرقت بينا الطرق
انت مشيت فى طريقك وانا كان ليا سكتى
تهت فى هيلامانى ودوشتى وزحمتى
اعذرنى لو سبتك وتهت فى موكبى
يا شعب سوريا الابى
يا شعب سوريا يا تايه ع الحدود
رجالك وشبابك وبناتك للثورة كانوا وقود
لا خافوا من صوت قنابل ولا بارود
بكره لوطنك مرفوع الراس راح تعود
و ماعدتش هتحتاج تاشيره دخول
من عربى او اجنبى
يا شعب سوريا الابى
يا شعب سوريا يا احرار
يا شعب سوريا يا ثوار
قوموا كملوا المشوار
ان طالت العتمة
اكيد اخرها نهار
وان طال ليل الكفر
وان زاد للدين تجار
بكره يجيلك نبى
يا شعب سوريا الابى
يا شعب سوريا ثور
ثورة تعيد النور
ياما شموس بتدور
تقول للصبح يصبح
وتقول للعتمة تغور
وهو ده مطلبى
يا شعب سوريا الابى
يا ثورة جاية بربيع
طغى عليها خريفها
الدم روى وطنى
حمى حماه ودمشق وريفها
الارض دى ارضى وعرضى
عارفانى وعارفها
هنا اتولدت انا وهنا اتدفن ابى
يا شعب سوريا الابى
يا شعب سوريا اعلى بصوتك فوق القمر بميت قمر
بكره لارادتك فى الحياة راح يستجيب القدر
والليل اكيد ينجلى والقيد ده راح ينكسر
يا شعب سوريا اصرخ لاجل ما تنتصر
ومعاك ربيع عربى يمنى مصرى
ليبى سعودى سودانى مغربى
يا شعب سوريا الابى
الثورة دى ما فى شئ هيموتها
طول ما بنتها بتغنى ويعلى صوت غنوتها
وتهتف بعلو الصوت يعلى صوت الرصاص
لاجل ما يسكتها
تعلى بصوتها فوق صوت الرصاص
وتحلف من تانى باسم امتها
ويغنى وراها الشعب ويعيد غنوتها
البيرودى والمالكى والادلبى
يا شعب سوريا الابى
يا صلاح الدين عود من تانى
جمع شامى وقنيطرى وزبدانى
جمع فى جيشك مسلم ونصرانى
نصرى ده هو عنوانى
واملى ومأربى
يا شعب سوريا الابى
يا شعب سوريا الحر
رجع امجاد الشام
وانشر عبير ثورتك
على جناح الحمام
انسج خيوط الامل
تحلى مرارة الايام
اوعاك فى يوم تتنازل
كفايانا بقى استسلام
نصرك ده مكسبى
يا شعب سوريا الابى
يا شعب سوريا الفرقة بتفتت الاوطان
اتوحد بكل كيانك ورا راية الحق والايمان
زلزل بنور العدل سطوة الطغيان
عيد من تانى الحب يملى الوجدان
ارفع رايات الثورة والعصيان
هز بثورتك جميع اركان كوكبى
يا شعب سوريا الابى
الوطن العربى اخوانا البعده عايزينه يتقسم
ويقف صاحبنا اياه فرحان بيتبسم
شايف وطنا مات وكمان بيتغسل
واحنا نقول وحدوه عشان بنستسهل
كفايانا بقى تقسيم
صلوا بينا ع النبى
ياللى عايزها طائفية
بطل تبقى غبى
الارض لينا كلنا
والدين ده لله
حضن الوطن بيضمنا
وبندفن سوا جواه
هات ايدك فى ايدى
نعيش ونموت فداه
واصرخ وقول يا سوريا
فداكى امى وابى
يا شعب سوريا الابى
******************************************
~
