سلام ربي يالعيون الذوابيل

تذكير بمساهمة فاتح الموضوع :

شِعِّي كما نجم(ن) شهر تالـيَ الليـل
وميلي كما غصنن تصارع والاثمـار
بـس اتعلّـل بالنظـر فيـك تعليـل
يا جامع البارد بمبسـم مـع الحـار
وإمشي كما ريم(ن) تمشَّـى هنافيـل
وعنق الحمام اليا التفت لي بالانظـار
وانغـام صوت(ن)خجَّلَـن المواويـل
صوتك كما ناي(ن) تناجـى وقيتـار
يا منعش(ن) روحي كما يحيي السيل
هشيم عشب(ن) دارسات(ن) بالاقفـار
سـلام ربـي يالعـيـون الذوابـيـل
ياللي عليك الرمش للمـوت سمسـار
بالله قل لـي كـم تبيـع الفناجيـل ؟
وانا علـي الطيـب والبـن وبهـار
والا فعطني من حلى التـوت بالميـل
من مبسم(ن) نلقى به الثلـج والنـار
افرغت لي قلب(ن) تخاوى مع الويل
ولوّعت لي روح(ن) على كف الاقدار
باللعب تلفح لـك طويـل المجاديـل
موج(ن) يغَرِّق كـل سابـح وبحـار
تضرب لها القينات ضرب المهابيـل
ياهي عذاب الكف بالرقص والطـار
عيون الحفل صارت عيون البهاليـل
لا ياغرير(ن) فعلهـا فعـل سحَّـار
مـن شفتهـا قلبـي كثيـر المغاليـل
اعيذهـا بالله مـع ذكـر الاذكــار
ياحفلة (ن) صـارت عليَّـه بهاذيـل
في ملعب(ن) تلقى به نجوم واقمـار
يا شبه عقد(ن) خالي(ن) م السلاسيل
تِوَسْطه شمس(ن) بها الليـل وانـوار
فيها مـن الحـور المسمـى تماثيـل
تشبه لريش(ن) او كما الطيف سيَّـار
فوق السحابـه مجلسـك والهماليـل
من حولك افلاك(ن) من الزين تنـدار